يا بورسعيد حكايتك نفس حكاياتنا
سكينه مغروسه فى قلبك ونار والعه ... فى بيتنا
يابورسعيد عيله ولَمه
ونصيبى من العميان
تخوين وإنكم أغراب ومفيش ... ذمه
بينكم وبين أرض البلاد مفيش ضمه
وكمان مفيش عندكم هِمه
أصل
ما أنتوش إخوان وعشيره ولمه
يا بورسعيد نفس حكاياتنا
نفس الهموم والطربوش وزنار أحمر وِعمه
عاصيين ... خارجين ... خاينين ... كارهين
أرضكم وعَلمكم ... وبيقولوا
إنكم أغراب
ومالكمش نصيب
وعيار يعمى العنين يضرب يصيب
عن تاريخ ومقاومه وريح على الأعداء تهب
تاريخ ومقاومه وريح
كون فسيح وولادها مكبلين بالأصفاد
أحكى يا تاريخ للأحفاد
أحكى ياتاريخ عن عن الأمجاد
نفس حكاياتنا... موتكم بالرصاص والظلم لكم هو موتنا
لو يعلى فى الفضا صوتنا
نصرخ ننادى فى الكون ونعلى
يا بورسعيد عيله ولَمه وضمة محبه وهمِه
يابورسعيد حكايتك نفس حكاياتنا
البيت هو بيتنا
والأرض والجذور والدم مخلوط بكل حبة رمل إتبنى بيها ... بيتنا
إيدك فى إيدنا عشان يرجع حق ولادك
ويا حقوقنا
نفس المراكب والتيار بيضرب فيكم وفينا
لو مامديناش إيدنا مسيره يهدم جذور... بيتنا
يا بورسعيد أرض البساله والشهدا ... أرض الصمود والتاريخ
من يوم موسى والمسيح
أرض واحده بنعيش فيها بالسلام
مفيش كلام
بيخلطونا وبيرسموا فينا نفس الملامح بأقلام لونها كالح
أصلهم عايزين يغيرونا ... ويفرقونا ... ويقسمونا
طينه واحده
مسلم مسيحى مصري قبطى ولاّنوبى
او... بورسعيدى
إيدك فى إيدى يا صاحبى نلم شمل اللى متفرقين
اللى متغربين
ع المحبه وع الوطن بيدوسوا
وإيدين رخيصه بيبوسوا
لو المراكب تسير
يبقى ع الجبان نعدى ... وندوسه
يا بورسعيد على صوتك لجل ما نسمع
خلى عيون الحب تبكى وتدمع
ع الولاد اللى ماتوا بالرصاص والبارود
يابورسعيد على صوتك لجل يوم جديد
أصلى ياما عليت صوتى والكل بيتمنى حتى موتى
ومحدش بيسمع
لو البكى والدموع تنفع
كنت أقضى عمرى وعليكىِ قلبى يدمع
يا بورسعيد
عيله ولمه خال آصيل وعمه
بيهمشوكى
وم الخريطه بيمسحوكى
نسيوا ان الأهرامات والتاريخ هما ابوكى
يابورسعيد نفس حكاياتنا موتك وموت ولادك يبقى موتنا
ولما صوتك يعلى فى الفضا يبقى صوتنا
تجوال وإنكسر كلام فاضى ما نسمعوش
ورقه م الورق فى الميه تنغسل تبوش
فى المهملات مهما إبنك فى الطل بات
أو حتى مات
الحق مسيره ينتصرمن سكات
والجبان ينكسر ومسيره لما مية النيل تزيد تفيض وللبساله تعيد
يندثر
الخيانه بين ولادك ملهاش تاريخ
أصلك يا غاليه بنت مسلمه ... بنت المسيح
جامع كنيسه أدان وجرس
اصلك تاريخ حضاره بدون مديح
تاريخ فسيح
لما يعلى صوتك
ومفيش فى يوم ينشروا خبر موتك
الآصاله والتاريخ هما قوتك
يا بورسعيد يا أم الولاد اللى من مية النيل شاربين
يبقى سيل ع العدو واللى يبيع
+++
أيمن وهبة
صوت صعيدى لبورسعيد
بعد الجور والظلم والجهل والانانيه التى تعرضت لها تلك المدينه الباسله ذات التاريخ والعراقه ومقاومتها للطغاه فهى كالعين التى تكشف للإنسان الطريق فحينما تطرف وحينما تدمع وحينما تبكى لا يحرك الجسد ساكن
أهلاوى بورسعيدى التراس حكومه ظالمه فلعلنا نرى فى صورة بورسعيد والنوبه صورة ما هُدم من كنائس وكل الشعب المصري يقف متفرجا مقهقها شامتا حينما نرى صورة الشهداء فى ماسبيرو
حينما قتلوا وهرسوا بعجلات وبإيدى مصريه صورة الماريناب واطفيح ونجع حمادى وكشح دار السلام وابوقرقاص وإمبابه
ومذبحة الإسكندريه فى ليلة رأس السنه
فهل لنا ان نكف عن الغدر والقتل ولا ينظر بعين الجاهل حينما يقول
أن السرقه طالما بعيد عن جيبى فلا مكرهه
أخويه سوف تُسرق أجلا ام عاجلا سوف يأتى الدور وتتذوق وتتجرع نفس الكاس
اخي شاعر الصعيد..تحية لقلمك الذي يواسي الجميع ويحث على المحبة بين الناس..قصيدة رائعة...تشكر عليها ويارب يحفظ شعب مصر...اخيك
ردحذف