الثلاثاء، 23 يوليو، 2013

رياسه وانتيكا



أيمن وهبة
Afw
+
رياسه وانتيكا
-
حِزمة ساسه ... ناس   هلاسّه
وشوية قوانين    قايمين   نايمين
حزمة وفيها سياسة    ناس  دساسه
و حِزمة ساسه ...  ناس هلاسّه طمعانه فى ... رياسه
لعبة وفيها الكدب
فيها الحب ... متلون ...  متكّون ... ونصّبر قلوبنا وعليها نهون 
وكل يوم    ماشى فى درب    مهما يكون
شرق وغرب
وفيها تجاره
ناس   قلوبهم مكاره ... مصنوعه من  وسط حجاره
و
ناس هلاسّه  عايزه الكرسى ومش فارقه رصاصة  
للّى يعارض 
ناس هلاّسه 
تاكل تشرب   وتنام فى سياسه  ...ويقولوا كياسه
بلادنا فى ايدهم بتضيع
ناس بينا   وعلينا بتصيع
لعبة بولتيكا... حاورينى يا طيطه 
لعبة دين... تُجّار بالدين  أيام من عمر بلادنا   وسنين
لعبة  بولتيكا  وصاحبنا اياه   واقف ... انتيكا
وصوابع جوا حاره مزنوقة... بتلعب
اصل بلادنا  ليهم صارت... ملعب 
ديابه و تعلب ... والخاسر يكسب وبشرع الله... يغلب
لعبة بولتيكا ...وشوية ساسه فى أزاز معروضه... أنتيكا 
عروق  اجدادنا دسّاسّه 
والعِرق يمد   لسابع جِد 
 حدّ وحدّ  وواحد تاجر بيُقيم  الحدّ
تعَبان م العدّ ... وودان وعنين بتشوف ... مخلوقه  فى حقوق   الناس
تتسدّ
و 
كرسى فيه طمعان ...محمد واخوه سمعان ... وواد خالة حمِدان
نِسر  وقط  وتِعبان
وحمامه بسيطه
حاورينى يا طيطه ...وصاحبنا واقف يتفرج  ... واقف أنتيكا
ناس م البرد بتموت ... وناس من كتر الأكل بتموت... ناس على رجليها بتزحف وتفوت... وناس راكبه وبتغير فوق كتاف الخلق 
وناس مش لاقيه القوت
كرسى فيه طمعان ...محمد واخوه سمعان أو ... حمِدان
كرسى فيه سر ... موس فوق رقاب الناس بيمر
باب وكل الناس  داخلين 
سامعين شايفين
الشط والبر
و
الكل عبيد   ... لتاريخ  صفحاته بيعيد
حُرّ من السجن  يفر 
يتكبل فيه  ... وفاكر انه صار حر
معارك علينا بتُكر
حزمة ساسه و ناس   هلاسّه
وناس غشاشة
ويبيعوا ويشتروا فى الجاهل ... باسم الدين
صلى وقول ع اللى  بقوله آمين
محمد   اخويا   وآمين
-
ايمن وهبة 

الأربعاء، 3 يوليو، 2013

ماكينة مصرية

أيمن وهبة 
Afw
-
ماكينه مصرى
بس مش عصريه 
قنبله يدوى من أيام حلفاء نا منسيه
فى عالم الجهل والتخلف وعلى الرصيف
مرميه 
وبتعرف المصرى والعيبه 
ولها فى العربى 
!!!
؟
ودى تانى ميزه 
وبتدور بالزق معانا تلت ميت (300) حق 
لما نركنها أصلها مش جايبه تمنها 
ماكينه مصرى صناعه محليه تركيبه مش مظبوطه 
دماغ طايره ووووو وليّه معبوطه 
فنجان قهوة مظبوطه 
ومش مستورد اصناف علينا من بره فى السوق مرميه وبتورد
بتقول كلام وتنسى الساعه كام عايزه تنام 
بردعه ولجام 
وليّه أتولت أمرنا خلت رقابنا سمسمه
والست جابت ورا
وراحت تنام
الست باك ي نام 
بقينا مسخره
!!! 
ماكينه مصرى تقفيل قديم 
فى البرد عايزه تسخين فرنساوى قديم ومتين 
ولها ارقام سريه 
يا خواتى واحده من الحوريه
!!!
شغلها على المركب يدوب ناخد برأيها لو فى صالحنا
وجاى الريح فى صالحنا 
وماشى فى طريقنا 
تبلعى ريقنا ... وتاكلى وتسمعى اوامرنا 
وتزق مركبنا وتسير معانا فى طريقنا 
لو فى صالحنا
ياريت معاكم احنا ما ركبنا
ننزل فى نص الطريق
ومنكم متشكرين
اصل السياسه عمرها ما ينفع تتخلط بدين
اصل الثوابت
لها كتاب ثابت 
اما السياسه لعبه مكشوفه لعبه مغشوشه 
شوية فوق وشوية على الارض 
مرشوشه
بضاعه مغشوشه وبتسوق وبتروق 
وبتعرف تغش 
لو دبان وشك تهش وبدلتك فى الميه تكش 
اتنين لا ينفع نجوزهم ولا ينفع يعيشوا سوا فى
بين حيطان بيت 

الثلاثاء، 11 يونيو، 2013

شمعة وكفن ورغيف



أيمن وهبة
Afw
+
شمعة وكفن ورغيف
+++
شايلين كفّنا ... ماسكين ... شموع
لجل حاجات كتير تعيش
شمعة وكفن ورغيف عيش
ندوس شوك برجلينا ونعدى... جبال الموت 
شعب غلبان مش لاقى رغيف عيش
وناس شاطره فى التكويش
عمل ثورة... وعنده كان مليون شعاع ... بيلمع
وعيار يعلى صوته وممكن يطيش 
مليون باب متقفلين ... وبحرين ظلمة... مترصصين 
شعب جربان فى وجهة نظر ... سادتهم منبوذين
مالهوش قيمة... مالهوش جذور... وبذوره جفت
شمعة وكفن ورغيف ... شمعة وكفن وبندقية
فيها بارود ... وعيل ماسك فى إيده حجر
غضب جوا قلوب ولاد بلد جدعان 
رجاله ونسوان
إنفجر
وما عادتش فارقه... نروح ويمكن للدار تانى ...ما نرجع 
يدفنوا اشلائى ولاّ ع الرصيف يرمونى
ماعادتش فارقه ...ننزف ويقطعونا ويدوسوا علينا 
ما عادتش فارقة ربنا واحد والعمر واحد ومحدش بيأخد زياده عن حقه وكله مكتوب ومتقدّر
جوا كتابنا مكتوب ... لو عاصى انا عن ذنوبى بكفّر
واتوب ... أصل الحياه ملهاش عنوان
وبتخون ذى الصديق لما يكون... بيخون صاحبة ويرمية 
فى اى حته مهما تكون ... يتخلى ويهرب ويلم اللى لِه ويهرب 
ماعادش لينا غير الرب مهرب
ونيلى اللى ... بيروينى
شمعة وكفن ورغيف 
شمعة وكفن وفى إيد اخويا ...سيف
بيقطع حشاى وياريت يفهم
!
؟
بينفذ أوامر وما بيحاولش بيفهم
مرهم ع الجروح بيزيد حروقى ... دم بيغلى جوا عروقى
أصل ضربت السيف من اخويا... بتوجع
كمان يبيع نعش أمى... ونعش أخويا
لو نعيش ... جوا أرضنا ... لو كان يعيش أبويا
!!!
؟؟؟
كنّا قسمنا ورسمنا بيّنا حدود... وبنينا سور وخلينا أرضنا الخضرا بور 
عشان نحارب ونغلب... ونحرق تاريخنا... ونقتل ونسرق 
بس انا لسه فىّ عقل... وكمان... بفهم
عشان مصري وكمان لىّ جذور
تاريخ ع الراس بأشيله وتراب أرضى ع الراس أهيله
أدهن جروحى بِه
فلاح وبيه وواحد جذوره مخضّرا
لا يمكن قدام الريح يقاوم... ولو وقع ... يبقى سراب أصل التاريخ 
به مليان خراب
اصل التاريخ فيه حروب فيه كلام 
ومليان اكاذيب 
!
؟
لو لوح تلج جوا أرضي كان يذوب
أصلها متعوده تُخلطّ ...تُشكل 
أصلها متعوده تروى والسر جوا نيلها ... جوا هواها
أصل الجذور صلبة
وما يهزها غربان ع الفروع
تاكل جيّف تاكل بقايا أكل السبوع والاسود
ليها قانون ماشية عليه محفورة جوا قلبها جوا سِفرها 
وكتابها مش من ورق
كتابها من كتاف ولادها المخلصين 
من دم ولادها الطيبين
م العرق
من امانه ... من حب 
ومن تاريخ له جذور

الجمعة، 24 مايو، 2013

بغاشه ومهلبيه



أيمن وهبة 
+
بغاشه  ومهلبيه  جوا 
تمثيلية
+
تمثيلية لقصه هايفه   بتتلفق  بطريقه  زايفه
 واخونا  فاتح لابس دروعه وسانن فى سيفه
 من حقوق غلبان بيدارى ...  خوفه
بيدارى كسوفه  جوا أحداث تمثيليه متّقسمه  فصول 
أبطالها وشوش ... عاديه
اخونا صالح مصري آصيل
من الفواكه او م الموالح
لون ضحكته  أصفر... قديم و    كالح
تمثيليه  لقصه 
خسيسه رخيصه والناس      تصدق 
!
غرقان ...  وفى حبال دايبه معلق
مين يصدق 
؟
حلقات التمثيليه  أحلى هريسه بيحشوها
 مهلبيه 
؟
!
وشُه مليان بشاشه ... تاكل بغاشه وعليه بيقولوا  طيب... حبّوب  وصالح 
ويلبسوا معاه احلى  خ....  ذوق 
انسان طيب وزوق 
خيار كتير بيوزعوه... وكلام ووعود    بيسمّعوووه 
بيقولوه ويرددوه
وقبل الإمتحان     بيعيدوه
حافظ تمام للتمثيليه    والناس بتاكل بغاشه 
 ومهلبيه
وعبارات للتحيه حتى لو كانت م العصور 
الجاهليه 
فاحت ريحتها وعِفت عنها عصور    بقشور كدب
 مدّاريه
وطنّا جامد كبير زى الخيار  مالى الهدوم ومش هفيه
تمثيله
وغباء فى الحوار 
مش مصدق
؟
!
مش مصدق كل اللّى دار 
بجد ومش هزار
دم مصري آصيل
وجنود  بتتحرر من غير من بندقيه اوطلقة   عيار 
  ولمبه الجاز فى ضلمة الليل 
زى الفنار 
والفواكه فجأه بتتحول    خيار
+
تمثيليه
شايف يا وطن انك بتتباع وفى التراب بيدفنوك
بيبيعوك ويسلخوا جلدك
ويملّحوك
  على الرصيف عريان      بيِعرضوك 
تمثيليه
وعقول غلبانه
مُرشد للسفن فى بحور  عتيه 
 وف ظلام
مرُشد هُمام تمام فى قلب الخطر بيمد حبال السلام
تمثيليه     وشوية شخابيط
شعب  مصري
عبيط 
؟
!
لو يصدق ... الحكايه ... م البدايه
لو يصدق ان المسلسل خطف وفديه  
وياهم عروض  ويا هديه وسينا صارت للجرايم 
وسيه 
وفيها ... حوارات
وعبارات رسايل تهديد 
وكلام مليان وعيد
ها ها ها
تمثيليه
+
أيمن وهبة



الأربعاء، 15 مايو، 2013

شربة زيـت



ايمن وهبة 
Afw
شربة زيت وشوية خروع
شربه لشوية مرضى 
شعب عبيط بورى وسبيط
مش تخبيط
ولا هى شتيمه
!
شعب ملهوش قيمه مشاهد سيما عادت ريما
سعاد وفهيمه
فى جحر 
وقع الشعب 
ماشيين تايهين زى السحِر
شربة زيت وشوية خروع 
خوفو وخفرع وجِدنا ... منقروع
شوية زيت نقول ونزيد ونعيد
فى صورة عبس 
شوية عدس فى ليلة برد زيد وعبيد
أجداد لهم أحفاد لهم اولاد ...........لكن 
أسياد
مش راح أزيد ولا ها نعيد
شعب عبيط مش تحبيط
ذات الأصبع ساد وإتربع وف وسطينا
بيزيد يتأسد وبيتضبع
وف حكاياته كلام و كلام حكمه تشبّع 
صُباع الحاكم يتحول سيف
عقلة إصبع دم خفيف
لف ودور أرض بلادنا صارت بور
شربة زيت ع النار بتفور
زيد وعبيد ومعاهم رمسيس وصفونا بشعب خسيس
مليان تهييس
علبْ هلبْ إخطف وأجرى 
قطر بيجرى دم جوا عروقنا بيجرى
فى الشارع ورمونا سمونا شعب عبيط
لكن متفرعن شعب وأرعن
ندل خسيس مليان تهييس
للجنس والنسوان واللذه 
لوسى و..............عزه
واحد عاشق عايز مزه وبلادنا عايزه الهزه
شعب وأرعن وعبيط جاهل ..... وبيستاهل كل اللى بيجرى له
واحد جاهل يتعلم وبياخد دوره
شعب عبيط قام بالثوره
شعب عبيط غارق فى الدوره
أصله مريض عايز يتعالج
سكران غرقان آصله مش فايق
جاهل يستاهل كل اللى بيجرى له
والكل بيتعلم فيه واللى فى تاريخه بيقرأ له
تاريخنا بير مش قادرين نوصل لأراره
شربة زيت وشوية خروع
حاكم بيخبط ع الجدران يتسند ع الحيط 
والشعب عليه بيزيط
يتخبط 
رابط شاش إسود على عينه
الله لو بيحب الشعب على اللى بيقتل فيه ممكن ها يعينه
ويخلص فقره وسنينه
حاكم بيخبط ع الجدران متغمى ومن مية ترجيع متحمى
شربة زيت وعم عمارة قاعد وحزين 
قلبه مليان متعبى ... أنين
شعر الراس بيودع والدقن علامة 
أصله علامه او علّامه
فى طريق الجنه طير بيطير غرقان فى الجنه
ويا حوريه وعادات شرقيه 
إقفل سّكر أوعى تفكر
إعزل أنت فى معزل ولاّ وسط المغزل
إحنا أسياد إحنا أجداد لكل حضاره لكل تاريخ
إحنا صنعنا الكوره وعملنا جبال وحفرنا بحار 
وووو..............
لكن دلوقتى معناش المال لكن دلوقتى إحنا عيال 
سرقونا عرونا وكل يوم اولادنا بيعرونا 
شعر الراس بيودع والدقن علامه ... واحد علّامه بيقود الدفه
شعب عبيط
نفخر به ونعليه
رمز بلادنا 
شعب عبيط ...مش تخبيط ولا تهبيط
ب
يقولوا علينا ويسمونا ... شعب عبيط
؟؟؟
شوية زيت ومعاهم رز كلام بيفز واخويا علينا لقمة عيش بيعز 
بط ووز
شربة زيت وشوية خروع
شعب عبيط ... مش تخبيط بورى وبلطى أو سبيط 
ذات الأصبع
بطن ولادنا مش راح تشبع
عقلة أصبع وثور بيثور
عتمه ونور وبنات... الحور أرضنا صارت بور
شربة زيت وشوية خروع جدنا منقروع وياه رمسيس
وسجاره محشيه تعمل كيف
كلام متلخبط ومحدش على بابنا بيخبط
بابنا صار مكسور شعب ومقهور
دقن وسبحه 
وبنات الحور تاريخ بيدور ناس بتثور
بابنا صار متكسّر 
وفوق دم ولادنا ندوس ...نتحسر
مين للى بيحصل فينا يفسر
فى 25 قلنا يمكن تتعدل 
!!!
لكن بعد النكسه ... مش شايفين غير الوكسه
قشر البطيخ ووزير للميه واحد بيهيس 
بيقولوا مهندس 
ووزير إعلام يتحرش
وسط كلامه بيعاكس ويشاكس وبيضحك
ومتبت ومثبت لازق متلزق 
رئيس بيقود الدفه ... أصله له فى العفه 
وست الكل واقفه محتشمه
كاشفه الوش ومش بتغش ولدبان الوش 
محدش بيهش
الكل إتخلى أبيض ومزّهر فُله
تاريخ لبلادنا ندوسه نرميه فى السله
أصله تاريخ عِله
وحرام
قلب بلادنا عايزه صمام او حمام
بعد الزيت 
غريب جوا البيت بيبع ويزيط
واحد فى كلامه بيهبل
كلام لبناتنا بيحبل
واحد بيخبط
شربة زيت وشوية خروع
شربه لشوية مرضى 
شعب عبيط بورى وسبيط
مش تخبيط
ولا هى شتيمه