الحق.. مابيزعلش حق/حنان مفيد
كتبهاbshara2011 ، في 29 أغسطس 2011 الساعة: 16:28 م
الحق.. مابيزعلش حق بقلم حنان مفيد ٢٨/ ٨/ ٢٠١١
المصرى اليوم
لأنهم ليسوا أصدقائى على فيس بوك، ولا معارفى على تويتر، ولا أعرف لهم بريداً إلكترونياً، ولا أحمل أرقام هواتفهم المحمولة، كى أخاطبهم برسائل قصيرة، لذا قررت أن أبعث لهم مضمون ما أعنيه بأسلوب المادة الإعلانية لما فيها من حبكة درامية ستكون الأقرب للوصول إليهم، والأسرع فى التأثير عليهم من مانشيتات الجرائد وبروموهات القنوات، وده أقل ما يقال عنهم، بعدما وجدت أن أغلب أهدافهم تسلل، سواء كانت بقصد أو عن جهل، لذا وجب التنبيه والإحاطة علّهم يتعظون ولا يغتاظون.
■المرشحون للرئاسة: بما إن حسنى ما طلعش مبارك، ولا بن على كان زين، ولا عبدالله فضل صالح، ولا حتى بشار جاب أسد، واللى كنا فاكرينه مُعمر أى قذافى للرصاص مِعدّى هيخلص عليه، إذن من غير المستحب لأى منكم كرئيس قادم إنه يعمل فيها ثورى من الشطار فى وطن عربى شبه منهار لازم تسيبو الكرسى بسرعة وتخلعوا قبل مليونية الجمعة موافقين ولا إيه؟
■ الشعب المصرى: طول عمره مذلول، اتباع نى ومحمص ومحروق ومتقرطس، ما هو بقاله ميت سنة ماطورش نفسه، فإحنا قلنا إن كده كفايه، الشعب المصرى مش هيتبهدل تانى (لا جوه حدوده ولا خارجها) واختارنا المأصل وسيبنا المكسر ولأول مرة بقى بيتكلم بالشطة واللمون، فاضل يتعلم من أوشا إزاى يلعب سنجل والدول العظمى كلها تقف نكست.
■عادل إمام: غريبة حكاية الواحد منا، كل واحد همه واحد بانتمائه أقوى وحبه أجمل من أى واحد وبإصراره ينجح وفى خياله يعيش عالم تانى ماصدفش زيه واحد ممكن بضحكة يؤثر فى واحد، وبدمعة يصعب ع الواحد، وبحركة يقول حكاوى كتير تفرح الواحد، وبكلمة يقرب لملايين وصوته يوصل لكل واحد، هى دى قيمة ٨٥ مليون واحد وقوتك مش إنك الزعيم والنجم رقم واحد.. قوتك فى قوة كل واحد.
■أسامة هيكل: الحق مابيزعلش حق، يمر الإعلام المصرى الآن بأزمة ثلاثية الأبعاد حسب أخبار ماسبيرو، خد عندك أزمة فقدان ثقة بين الإعلام وجمهوره، أزمة فقدان تواصل بين الإعلام وأبنائه، أزمة فقدان رؤية بين الإعلام ورسالته، الهيكل متصدع يا أسامة مع حفظ الألقاب، وهناك تراث من السلبيات تلاحقك لا ينفع معاها تكبر ولا تسيطر.
■ عمرو حمزاوى: آراؤك وأفكارك زى بوكسراتك، منهم اللى بتحبه من وأنت صُغير، ومنهم اللى عايز يتغير، فيه منهم اللى لازق شويتين ومنهم برضه اللى زنقك حبتين وزى ما فيه منهم اللى دايماً تعبك، بتلاقى اللى مريحك وواقف جنبك، بتلاقى اللى سندك ومحلى شكلك، لما تختار أحلامك فى البشر والأماكن والمراحل والمواقع، اختار اللى تقدر تعتمد عليه.
■ توفيق عكاشة، صاحب الفراعين: يؤيد شباب إسرائيل فى مظاهراته الخاشدة – عبرياً ضد حكومة نتن/ياهو ويدافع عن السفرديم ضد الأشكيناز والفلاشا وكأن الذى قتل الضباط والمجندين على حدودنا لا يَمت لهذه الفيروسات بصلة، عموماً الزجزجة دى مزاج.. يا ترى زجزجت النهارده؟!
■نجيب ساويروس: قولى هى السلعوة ودنها طويلة وبتحركها لما تلاقى فريسة.. فريسة انت ولاّ إيه!؟
■ ممدوح حمزة: عطشان يا ضنايا مع إن ده بلده النيل.
■إبراهيم عيسى: شكراً شكراً شكراً، ما تقولش بسيطة وسهلة، بسيطة لكن مستهلة.
■يسرى فودة: منتج مختلف.. شكل مختلف.. طعم مختلف.
■ خالد صالح: اختراع يا كوتش.
■محمود سعد: إنت مش كبرت على البطاطس ده.
■الجماعة الإسلامية: ١٤ قرش يعملوا كتير فى بحركم، لكن على أرضنا ما يجبوش تمن بوب العيد.
■فقهاء اللجنة التأسيسية: حط الأنكل على الركبة تبقى أرجل من دروجبا.. مصر محتاجة لك.. استرجل.
■الأحكام فوق وتحت وجنب الدستورية: الدنيا لسه فيه أكتر.
■الدولة المدنية: هى اللى تستاهل، إديها صوتك ولو الأصوات كتير هتساعد فى التغيير.
■ الثوار: الفرق بين الثائر الليبى والثائر المصرى، إن الأول عمل ثورة ومِسك الحكم، والتانى عمل ثورة وخد حكم، فاهمين ولا مش فاهمين؟!
■أما آخر إعلان فهو إهداء لأبى فوق الشجرة مفيد فوزى: فيه أسباب كتير تخلينا نصدق إن بكره أحلى.. انسى كل اللى فات، زعق وقول اللى جواك، افرد جناحك وطير ف الهوا، سقفك بعيد فوق ف السما.
— —
الجهل فى حياتنا
لساته
مخّوفنا وهو جبان
لا
يقدر يواصل
ولا
ليه فى النزال
جوا
ناس ونايم
فارش وراسم
ومتربع كمان
رامى شباكه
وبخيوطة
مكبّل حنكنّا
عايز الأمان
—
شاعر الصعيد
أيمن وهبة
afw
ليست هناك تعليقات:
إرسال تعليق